መግቢያ
በየዕለቱ ፀሐይ ስትወጣና ስትጠልቅ ፣ ሌሊት በቀን ሲተካ እንመለከታለን። ይህ ለእኛ የተለመደ ክስተት ቢመስልም፣ ከጀርባው ግን የአላህን (ሱ.ወ) ታላቅነት ፣ ጥበብና ኃይል የሚናገር ጥልቅ መልእክት ይዟል። የሌሊትና የቀን መፈራረቅ በኢስላም እይታ የጊዜ ሽግግር ሳይሆን፣ የፈጣሪን አንድነትና ብቸኛ ተመላኪነት ከሚያሳዩ ታላላቅ ምልክቶች (አያዎች) አንዱ ነው።
ይህ ጽሑፍ ይህንን በየዕለቱ የምንኖረውን ተአምር ከቁርአናዊ አንጸባራቂ እይታ በመመርመር ፣ ለሰው ልጆች የተቸረውን ጸጋ ፣ በህይወታችን ላይ ያለውን ሥርዓት እና ይህ ሁሉ እንዴት ወደ አንድ አምላክ አምልኮ ሊመራን እንደሚገባ ያስቃኘናል።
ጸጋና ሥርዓት፡ ሌሊትና ቀን ለሰው ልጆች ያላቸው ጥቅም
የፈጣሪን አንድነት ፣ አምላክነትና የዚህ ፍጥረተ አለም ጌታ መሆኑን የሚያመላክቱ ምልክቶች ብዙ ናቸው።
ከነዚህ ታላላቅ ምልክቶችና አስደናቂ ማሳያዎች መካከል በየቀኑ የምናየውና በየጊዜው ጠዋትና እና ማታ የምንመለከተው የሌሊትና የቀን መፈራረቅ ነው።
አል-ቁርአን
(ሱረቱል ፉሲለት 41፡37)
‹‹ሌሊትና ቀን ፣ ፀሐይና ጨረቃ ከምልክቶቹ ናቸው››
አሏህ ለባሮቹና ለፍጥረቱ ሌሊትና ቀንን በማፈራረቅ ውለታ ውሎላቸዋል፡፡ የአሏህ ባሮች በሌሊት እንዲያርፉ ፣ በቀን ደግሞ ለኑሯቸው ፣ ለሥራቸውና ለተግባራቸው እንዲበተኑ አድርጓል።
አል-ቁርአን
(ሱረቱል ቀሶስ 28፡73)
‹‹ሌሊትን እና ቀንን ከችሮታው እንድትፈልጉና እድታመሰግኑት በውስጡ እንድታርፉበት ማድረጉ ከእዝነቱ ነው።››
የሌሊትና የቀን መፈራረቅ ሰዎች የሳምንታትን ፣ የቀናትን ፣ የወራትን እና የዓመታትን ቁጥር እንዲያውቁ አድርጓል።
አል-ቁርአን
(ሱረቱል ኢስራዕ 17፡12)
‹‹የዓመታትንም ቁጥርና ሒሳብ ታውቁ ዘንድ ነው፤ ነገሩንም ሁሉ ለይተን በዝርዝር ዘርዝረነዋል።››
መለኮታዊው ጥሪ፡ ዘላለማዊ ሌሊት ወይም ቀን ቢሆንስ?
ጊዜ ሁሉ አንድ አይነትና ወጥ ቢሆን ኖሮ ምንም ነገር አይታወቅም ነበር። አላህ (ሱ.ወ) ይህ ጸጋ ምን ያህል ታላቅ እንደሆነ እንድናስተውል በሚከተለው አንቀጽ ይፈትነናል፡-
አል-ቁርአን
(ሱረቱል ቀሶስ 28፡71-73)
‹‹በላቸው፡- ‹ንገሩኝ አሏህ ሌሊትን እስከ ትንሣኤ ቀን ድረስ ዘውታሪ ቢያደርግባችሁ ከእሱ ሌላ ብርሃንን የሚያመጣላችሁ አምላክ ማን ነው? አትሰሙምን?› በላቸው፡- ‹ንገሩኝ አሏህ ቀንን እስከ ትንሣኤ ቀን ድረስ ዘውታሪ ቢያደርግባችሁ ከእሱ ሌላ በውስጡ የምታርፉበትን ሌሊት የሚያመጣላችሁ አምላክ ማን ነው? አታዩምን? እሱም ከችሮታው እንድትፈልጉና ታመሰግኑት ዘንድ ሌሊትንና ቀንን በውስጡ ልታርፉበት ማድረጉ ከእዝነቱ ነው።››
ይህ ጥያቄ ከርሱ ውጭ ሌላ ኃይል እንደሌለና የሕይወት ሚዛን በእርሱ እጅ ብቻ እንደሆነ ያስገነዝባል።
የሥነ-ምህዳር ሚዛን፡ የፈጣሪ ጥበብ ማሳያ
በጨለማው ሌሊትና በብርሃናማው ቀን መካከል ያለው ሥርዓታዊ መፈራረቅ ለዚህ ሕይወት አስፈላጊ ከሆኑ ነገሮች ውስጥ አንዱ ነው።
- የሙቀትና የእርጥበት መጠንን ይቆጣጠራል፣
- በተለያዩ የምድር ክፍሎች ያሉ ሕይወታዊ ሂደቶችን ያስተካክላል፣
- የውሃ ዑደትን ፣ የማዕበልና የባህር ሞገድ እንቅስቃሴን ያመዛዝናል።
ይህ ሁሉ የአጽናፈ ሰማይ አፈጣጠር ምን ያህል ትክክለኛና ጥበብ የተሞላበት መሆኑን ይመሰክራል።
ቀን እና ሌሊት የአፅናፈ ሰማይ አፈጣጠር ትክክለኛነትና በውስጡ ያለውን የእያንዳንዱን አካል እንቅስቃሴ ሥርዓት የሚመሰክሩ ታላላቅ የአሏህ ምልክቶች ናቸው።
እነሱ የአላህን ሃይልና ችሎታ እንዲሁም በፍጥረቱ ውስጥ ያለውን አሠራር የሚያመለክቱ አስደናቂ ምልክቶች ናቸው።
የመጨረሻው መልእክት፡ አምልኮ ለፈጣሪ እንጂ ለፍጡራን አይደለም
በመጨረሻም የሌሊትና የቀን ገጽታ በጨለማና በብርሃን ፣ በርዝመትና በአጭርነት መለያየቱና በተስተካከለ ሥርዓት መፈራረቃቸው ሁሉን ቻይ ፣ አዋቂ እና ጥበበኛ የሆነ ፈጣሪ እንዳላቸውና አምልኮና ስግደት ከእሱ ውጭ ላለ ለማንም ሳይሆን ለእሱ ብቻ መሆን እንዳለበት የሚያሳይ ቁርጥ ያለ ማስረጃ ነው።
አል-ቁርአን
(ሱረቱል ፉሲለት 41፡37)
‹‹ሌሊትና ቀን ፣ ፀሐይና ጨረቃም ከምልክቶቹ ናቸው፡፡ ለፀሐይና ለጨረቃ አትስገዱ፡፡ እሱን ብቻ የምታመልኩ ከሆናችሁ ለፈጠራቸው አሏህ ብቻ ስገዱ፡፡››
ማጠቃለያ
ሲጠቃለል የሌሊትና የቀን መፈራረቅ በየዕለቱ የሚታደስ የአላህ ታላቅ ተአምር እና ግልጽ ምልክት ነው።
ይህ ክስተት የጌታችንን ኃይል ፣ ጥበብና ለፍጥረቱ ያለውን እዝነት ያስታውሰናል።
እነዚህን ምልክቶች ማስተንተን ኢማናችንን ያጠናክራል ፣ ለአላህ ያለንን ምስጋና ይጨምራል ፣ አምልኮታችንም ሁሉ ለፈጠረው እንጅ ለፍጡራን ሊሆን እንደማይገባ ያረጋግጥልናል።
እርስዎስ በሌሊትና ቀን መፈራረቅ ውስጥ ምን አይነት የፈጣሪን ጥበብ ተመልክተዋል? ሀሳብዎን በአስተያየት መስጫው ላይ ያጋሩን።
Share