በዲን ወሰን ማለፍ፡ ወደ ሽርክ የሚወስደው ስውር መንገድ

Author picture
በሃይማኖት 'ከመጠን ያለፈ ፍቅር' እንዴት ወደ ታላቁ ወንጀል እንደሚመራ የሚያስረዳ ወሳኝ ትንታኔ ከቁርአንና ከሐዲስ ማስረጃዎች ጋር።

መግቢያ

ለደጋግ የአላህ ባሮች ያለን ፍቅርና ክብር የኢማናችን አካል ነው። ነገር ግን ይህ ፍቅር ወሰኑን ሲያልፍ ምን ይከሰታል? ሰይጣን ይህንኑ ስሜት ተጠቅሞ ሰዎችን ከእውነተኛው የተውሒድ መንገድ በማውጣት በኢስላም ትልቁ ወንጀል ወደ ሆነው ሽርክ እንዴት ይከታቸዋል? ይህ ጽሑፍ በዲን ወሰን ማለፍ የሚያስከትለውን ከባድ አደጋ ከቁርአንና ከነብዩ (ሰ.ዐ.ወ) አስተምህሮቶች በመነሳት በጥልቀት ይዳስሳል።

ሰይጣን በደጋጎች ስም የሸረበውን ስውር ወጥመድና ከእሱም እንዴት መዳን እንደሚቻል እንመለከታለን።

የቁርአን መሰረታዊ ጥሪ፡ ተውሒድ እና የሽርክ አደገኝነት

ቅዱስ ቁርአን ከመጀመሪያው እስከ መጨረሻው ወደ ተውሒድ (አሏህን በብቸኝነት ወደ ማምለክ) የሚጣራ ፣ ሽርክን (ማጋራትን) የሚያወግዝ እንዲሁም በሁለቱም ዓለማት የአጋሪዎች (የሙሽሪኮች) መጨረሻ ምን ያህል የከፋ እንደሆነ ያብራራል። ሽርክ አንድ ፍጡር ሊሰራው ከሚችለው እጅግ የከፋና ትልቁ ወንጀል ነው።

አላህ (ሱ.ወ) እንዲህ ይላል፡

አል-ቁርአን

(ሱረቱ ኒሳዕ፡ 48)

‹‹አሏህ በእሱ ማጋራትን በፍፁም አይምርም፤ ከዚህ ሌላ ያለውንም (ሃጢአት) ለሚሻው ሰው ይምራል።››

ይህ የሆነበት ምክንያት ሽርክ የሰው ልጅ ለዓለማቱ ንጉሥ ፣ ለሰማያትና ከምድር ፈጣሪ መተናነስ ሲገባው በአለም ላይ የቅንጣጢት ክብደት ያህል እንኳን ስልጣን ለሌለው ደካማ ፍጡር እንዲዋረድ ስለሚያደርግ ነው።

የሸይጧን ወጥመዶች፡ በደጋግ ሰዎች ላይ ወሰን ማለፍ (ጉሉው)

ሰይጣን የሰው ልጆችን ከቀጥተኛው መንገድ ለማሳት የተለያዩ ስልቶችን ይጠቀማል። ከእነዚህም ውስጥ ዋነኛውና እጅግ አደገኛው “ጉሉው” ወይም በዲን ወሰን ማለፍ ነው።

ይህ ወጥመድ አብዛኛውን ጊዜ የሚመጣው ለደጋግ የአላህ ባሮች ባለ መልካም እሳቤና ፍቅር ሽፋን ነው። ይህ በኑህ ህዝቦች ዘመን የተከሰተው ነው።

አል-ቁርአን

(ሱረቱ ፋጢር፡ 6)

‹‹ሰይጣን ለእናንተ ጠላት ነውና ጠላት አድርጋችሁ ያዙት። ተከታዮቹን የሚጠራ የሳት ጓዶቹ እንዲሆኑ ብቻ ነው፡፡››

ሰይጣን ይህን ፍቅርና ክብር ቀስ በቀስ ወደ ማላቅና ከሚገባቸው ደረጃ በላይ ከፍ ማድረግ በመቀየር፣ ልክ በኑህ ህዝቦች ላይ እንዳደረገው ሰዎችን ወደ ሽርክ ይወስዳቸዋል። ለዚህም ነው ቁርአን፡

አል-ቁርአን

(ሱረቱ ኒሳዕ፡ 171)

‹‹በሃይማኖታችሁ ወሰን አትለፉ።››

በማለት በጥብቅ የሚያስጠነቅቀው።

ነብያዊ ማስጠንቀቂያዎች፡ “ከወሰን ማለፍ ተጠንቀቁ!”

የአላህ መልክተኛ (ሰ.ዐ.ወ) ይህንን አደገኛ መንገድ በመዝጋት የተለያዩ ትምህርቶችን ሰጥተዋል።

አጠቃላይ ማስጠንቀቂያ፡ ‹‹ከወሰን ማለፍ ተጠንቀቁ፤ ከእናንተ በፊት የነበሩትን ያጠፋቸው ይኸው ወሰን ማለፍ ነውና›› በማለት የጥንት ህዝቦች ጥፋት መንስኤ መሆኑን ገልጸዋል።

ልዩ ማስጠንቀቂያ (በራሳቸው ላይ): ተከታዮቻቸው እርሳቸውን ከልክ በላይ በማወደስና በማላቅ በስህተት ውስጥ እንዳይወድቁ በተደጋጋሚ አስጠንቅቀዋል።

“ክርስቲያኖች እንዳላቁት እኔን አታሉቁኝ”፡ የነብዩ (ሰ.ዐ.ወ) ትህትና

ከማስጠንቀቂያዎቻቸውም መካከል ትልቁ ምሳሌ የሚከተሉት ሐዲሶች ናቸው፡

ነብዩ ሙሐመድ (ሰ.ዐ.ወ)

‹‹ክርስቲያኖች የመርየምን ልጅ (ኢሳን) እንዳላቁትና ከፍ ከፍ እንዳደረጉት እኔን አታልቁኝ (ከፍ ከፍ) አታድርጉኝ፡፡ እኔ የአሏህ ባሪያ ነኝ፡፡ ስለዚህ ‹የአሏህ ባሪያና መልክተኛ› በሉኝ ብለዋል፡፡››

በሌላ ታሪክ አንድ ሰው ወደ እሳቸው መጥቶ

ነብዩ ሙሐመድ (ሰ.ዐ.ወ)

(ነሳኢ ዘግበውታል፤ ሐዲሱ ሶሂህ ነው)

‹‹አንተ ሙሐመድ ሆይ! ጌታችን ፣ የጌታችንም ልጅ ፣ ከኛም በላጫችን ፣ የበላጫችንም ልጅ…›› ሲላቸው የአሏህ መልክተኛ (ሰ.ዐ.ወ) እንዲህ አሉ፡- ‹‹በንግግራችሁ ላይ ፅኑ፤ ሰይጣን እንዳያስታችሁ። እኔ የአብደላህ ልጅ ሙሐመድ ፣ የአሏህ ባሪያና መልክተኛው ነኝ። አሏህ ካስቀመጠኝ ደረጃ ከፍ እንድታደርጉኝ በፍጹም አልወድም።››

በነብዩ (ሰ.ዐ.ወ) መብት ላይ ወሰን ማለፍ ክልክል ከሆነ ከእሳቸው በታች ባሉ ሰዎች ላይ እንዴት ሊሆን ነው?!

የፍጡራን ደረጃ እና የፈጣሪ ልቅና

የኢስላም አስተምህሮት ሚዛናዊ ነው። ፈጣሪነት ፣ አምላክነት ፣ አምልኮና ታላቅነት ሁሉን ቻይ ለሆነው አሏህ ብቻ የተገባ ነው። ከእሱ ውጭ ያለው ሁሉ ፍጡር ነው።

ነብዩ ሙሐመድ (ሰ.ዐ.ወ) የአሏህ ባሪያና መልክተኛው ናቸው፡፡ አሏህ መርጧቸው መልክተኝነትን እና ነብይነትን ተሰጥቷቸዋል።

እንደዚሁም እያንዳንዱ ፍጡር የራሱ ደረጃና ክብር አለው፤ ከደረጃው ማሳነስም ሆነ ወሰን አልፎ ማላቅ ጥፋት ነው። አላህ ነብዩ (ሰ.ዐ.ወ) ለህዝባቸው ይህን እንዲሉ ያዛቸዋል፡

አል-ቁርአን

(ሱረቱል ጅን፡ 20-22)

‹‹ሙሐመድ ሆይ! የምገዛው ጌታዬን ብቻ ነው፤ በእሱም ላይ ማንንም አላጋራም በል፡፡ እኔ ለእናንተ ጉዳትንም ቅን መንገድንም አልችልም በል፡፡ ከአሏህ (ቅጣት) አንድም አያድነኝም፤ ከእሱም ሌላ መጠጊያ ፈፅሞ የለኝም በላቸው።››

ማጠቃለያ

ሲጠቃለል ኢስላም ለደጋግ ሰዎች ክብር እንድንሰጥ ቢያስተምርም ፣ በዲን ወሰን ማለፍ ወደማይማረው የሽርክ ወንጀል እንደሚወስድ በግልጽ ያስጠነቅቃል።

የነብዩ (ሰ.ዐ.ወ) እና የባልደረቦቻቸው መንገድ ሚዛናዊነትን የተላበሰ ነው። እውነተኛው የነብዩ ፍቅር ፈለጋቸውን መከተል እንጂ ከፈጣሪ በተሰጣቸው ደረጃ ላይ ከፍ ማድረግ አይደለም።

ሁላችንም ከዚህ ስውር የሰይጣን ወጥመድ አላህ ይጠብቀን። በዚህ ርዕስ ላይ የእርስዎ አስተያየት ምንድን ነው? ከታች ባለው የአስተያየት መስጫ ላይ ያጋሩን።

Related posts

Leave a Comment

Your email address will not be published. Required fields are marked *

Share