መግቢያ
በሰው ልጅ ግንኙነት ውስጥ መበዳደልና መሰናከል የማይቀር ጉዳይ ነው። አንድ ሰው ሲበድለን በልባችን ውስጥ የቂምና የቁጣ ስሜት ማቆራችንም ተፈጥሯዊ ሊመስል ይችላል። ነገር ግን ይህ ስሜት የነፍሳችን እስረኛ አድርጎ ሰላም ይነሳናል። ታዲያ መፍትሔው ምንድን ነው? ይቅርታ በኢስላም ውስጥ ያለው ቦታ ከፍ ያለ ሲሆን ለሌሎች ምህረት ማድረግ ለራሳችን የምንሰጠው ትልቁ ስጦታ ነው።
ይህ ጽሑፍ ቂምን መያዝ እንዴት በራሳችን ላይ የምንፈጽመው በደል እንደሆነ ያስረዳል፤ የበደሉንን ይቅር በማለት እንዴት የላቀ መንፈሳዊ ደረጃ ላይ እንደምንደርስና ወደ አላህ እዝነት መቅረብ እንደምንችል ከቁርአንና ከነብዩ አስተምህሮ በመነሳት ይዳስሳል።
ለምን ይቅር ማለት ይከብደናል? የነፍስ ትግል
ሃያሉ አላህ በቅዱስ ቁርአኑ እንዲህ ሲል ያዘናል፦
አል-ቁርአን
(ሱረቱል ሂጅር፡ 85)
‹‹መልካም ይቅር ማለትን ይቅር በል፡፡››
ይቅር በል፤ እለፍም!
ይህ መለኮታዊ ትዕዛዝ ቢኖርም ብዙ ጊዜ ይቅርታ ማድረግ ይከብደናል። በእርግጥ ከወንድማማችነት መብቶች መካከል መዋደድና ይቅርታን መለዋወጥ እንዲሁም ስህተታቸውንም በይቅርታ ማለፍ ይገኙበታል፡፡
ብዙ ጊዜ ሌሎች መጥፎ እንደሆኑ እንፈርዳለን፤ በዚህም ምክንያት ከእነሱ የተሻልን መስሎ ስለሚሰማን እና ለራሳችን ከፍ ያለ ቦታ ስለምንሰጥ ስህተታቸውን በቸልታ አናልፍም፡፡ ነገር ግን እውነተኛው ሚዛን ራስን መመልከት ነው።
እኛ እራሳችን ስህተቶችና እንከኖች እንዳሉብን ስናስታውስ በነፍሳችን ውስጥ ለሌሎ ሰዎች ስህተት የትህትና ስሜትን ያድርብናል፡፡
ለዚህም ነው አላህ (ሱ.ወ) እንዲህ ሲል ያስጠነቀቀን፦
አል-ቁርአን
(ሱረቱ ነጅም፡ 32)
«ነፍሶቻችሁ ንፁህ እንደሆኑ አታወድሱ፡፡ እሱ አሏህን የፈራውን ሰው ጠንቅቆ ያውቃልና፡፡»
የቂም መርዝ፡ በራስ ላይ የሚፈጸም በደል
ብዙ ጊዜ ሌሎች ሰዎች ስለበደሉን እነሱን መልሰን መበደል ወይም መናቅ እንዳለብን የሆነ ስሜት ይሰማናል፤ ነገር ግን መልእክተኛችን (ሰ.ዐ.ወ) ያስተማሩን የይቅርታ እና የምህረት መንገድ ነው።
እነዚህን አሉታዊ አስተሳሰቦችና ስሜቶች ማስወገድ ይኖርብናል፡፡ በሌሎች ላይ የምናሳድረው ጥላቻና ቂም መጀመሪያ የሚጎዳውና የሚበላው የራሳችንን ጤና ፣ ደስታ እና መንፈሳዊ ሰላም ነው።
ቂም በሰውነት ውስጥ እንደሚሰራጭ መርዝ ነው፡፡
- የነፍስን ንፅህና ያጠፋል።
- የመንፈስን ውበት ያደበዝዛል።
- የአካልን ጥንካሬ ያዳክማል።
ይህን አሉታዊ ስሜት ከውስጣችን አስወግደን ፣ በይቅርታ ስሜት መተካት አለብን።
ይቅርታ በኢስላም የአማኝ እይታ፡ ከበደል ባሻገር ያለውን መረዳት
አንድ አማኝ ነገሮችን የሚመለከትበት መነጽር ከሌሎች ይለያል። ማንም ፍጹም እንዳልሆነና ከአላህ ጥበቃ ውጭ ሁሉም ሰው ድክመትና ጉድለት እንዳለበት ይረዳል። ከዚህም በላይ በአላህ ውሳኔ (ቀደር) ላይ ያለው እምነት የጸና ነው።
የደረሰበት ነገር ሊስተው እንዳልነበር ፣ የሳተውም ነገር ሊደርስበት እንዳልነበር በእርግጠኝነት ያውቃል።
ስለዚህ በነገሮች ውጫዊ ገጽታ ላይ ከማተኮር ይልቅ ከእያንዳንዱ ክስተት ትምህርት በመውሰድ ነፍሱን በውስጥም በውጭም ለማጥራት ይተጋል።
የይቅርታ በሮች ፡ የአላህን ምህረት መጎናፀፊያ
ስለዚህ… ከቂም ባርነት እራስህን ነፃ ለማውጣት ወስን፤ ይቅር በል፡፡ በአንተ ላይ ስህተት የሰሩትን እና የበደሉህን ሁሉ ይቅር በል፡፡
በእርግጥ የሌሎችን ስህተት ይቅር በማለትህ የአሏህ እዝነትና ምህረት በዙሪያህ ያካብብሃል፡፡ አሏህ ከባሮቹ መካከል አዛኞችን እንደሚያዝንላቸውና ባሮቹን ይቅር የሚሉትንም ይቅር እንደሚላቸው አስታውስ!
ማጠቃለያ
ይቅርታ በኢስላም የድክመት ምልክት ሳይሆን የትልቅ የሞራል ጥንካሬና የመንፈሳዊ ብስለት ማሳያ ነው። ቂምን በልብ ውስጥ ማቆየት እራስን በእሳት እንደማሰር ነው።
የበደሉንን ይቅር ስንል በዋነኝነት የምንጠቅመው እራሳችንን ነው። ከቂም እስር ቤት በመውጣት እውነተኛ ነፃነትና የአእምሮ ሰላም እናገኛለን፤ ከሁሉም በላይ ደግሞ የሃያሉን አላህ ምህረትና ውዴታ እንጎናጸፋለን።
ይቅር በል፤ እለፍም!
ይቅርታ ማድረግ በህይወትዎ ላይ ያመጣውን ለውጥ ወይም በዚህ ዙሪያ ያለዎትን ጥያቄ ከታች ባለው የአስተያየት መስጫ ላይ ቢያጋሩን ደስ ይለናል።
Share