ሶላት የጭንቀት መፍትሄ ፡ የልብ እርጋታ ሚስጥር

Author picture
ሶላት ከጭንቀት በላይ ነው፤ የነፍስ እርጋታና ከፈጣሪ ጋር ጥልቅ ግንኙነት የሚፈጥርበት መለኮታዊ ቁልፍ ነው።

መግቢያ

በዘመናችን ህይወት በውጥረትና በቀውስ የተሞላች ናት። ብዙዎቻችን የነፍስ ሰላም እና የልብ እርጋታን እንሻለን። ታዲያ መፍትሔው የት አለ? የአላህ መልእክተኛ (ﷺ) አንድ ነገር ሲያሳስባቸው ወዲያውኑ ወደ ሶላት ይቆሙ ነበር። ይህ የሚያሳየን ሶላት የጭንቀት መፍትሄ መሆኑን ብቻ ሳይሆን ለምእመናን አስተማማኝ መጠለያና የሰላም ምንጭ መሆኑን ጭምር ነው።

ይህ ጽሑፍ ሶላት ፣ በተለይም በውድቅት ሌሊት የሚሰገደው ተሐጁድ ፣ እንዴት የህይወት ውጣ ውረዶችን በብቃት ለመወጣት እንደሚረዳንና ከሀያሉ ጌታችን ጋር ያለንን ግንኙነት እንደሚያጠናክር በጥልቀት ይዳስሳል። ወደዚህ መንፈሳዊ ጉዞ አብረን እንዝለቅ።

ሶላት ፡ በችግር ጊዜ የማይናወጥ መጠጊያ

የአላህ መልእክተኛ (ሰ.ዐ.ወ) ህይወት ለአማኞች ሁሉ ምርጥ ተምሳሌት ነው። እሳቸው አንድ ጉዳይ ሲያጋጥማቸው ወይም ልባቸው ሲጨነቅ መፍትሔ ለማግኘት የሚቻኮሉት ወደ ሶላት ነበር።

ሶላት በህይወት ማዕበል ውስጥ እንደምትቆም ጠንካራ መርከብ ፣ ለመንፈሳችን አስተማማኝ መጠለያ ናት።

የእርሳቸውን ፈለግ የተከተሉት ሶሃቦችም (ረ.ዐ) በድሎት ጊዜ ለጌታቸው ምስጋናን በሶላት ይገልጹ እንደነበረው ሁሉ፤ በመከራ ጊዜም መጽናኛን የሚያገኙት በሶላት ነበር።

ይህም ሶላት ከፈጣሪ ጋር የምንገናኝበት ልዩና የተቀደሰ ጊዜ መሆኑን ያሳያል።

የሌሊት ሶላት ፡ የደጋጎች ሚስጥርና የነፍስ ፈውስ

አምስቱን የግዴታ ሶላቶች ከመስገድ በተጨማሪ የአሏህ መልዕክተኛ (ሰ.ዐ.ወ) በውድቅ ሌሊት ለሶላት ይቆሙ (ይሰግዱ) ነበር። የሌሊት ሶላት (ተሐጁድ) የደጋጎችና የአላህ ወዳጆች መለያቸው ነው።

ከቀን ጫጫታና ከህይወት ግርግር ርቆ ፣ ፍጡራን ሁሉ በእንቅልፍ ዓለም ሲሆኑ አማኝ ከጌታው ጋር ብቻውን የሚገናኝበት ውድ ጊዜ ነው።

የአሏህ መልዕክተኛ (ሰ.ዐ.ወ) የሌሊት ሶላት እንዴት ለእረፍት ምክንያትና ለልብ እርጋታ መንገድ እንደሚሆን አስተምረውናል።

ነብዩ (ﷺ) ይህ ሶላት ምን ያህል ታላቅ እንደሆነ ሲያስተምሩን፦

  • ለመንፈስ እረፍት ይሰጣል፦ የደከመች ነፍስን በማረጋጋት የልብ እርጋታን ያስገኛል።
  • የበሽታ ፈውስ ነው፦ “የሌሊት ሶላትን አደራ፤ ከእናንተ በፊት የነበሩ የደጋጎች ልምድ ነውና፤ ወደ ጌታችሁ የሚያቃርብ፣ ኃጢአትን የሚያብስና በሽታን ከሰውነት የሚያስወግድ ነው።” በማለት አስተምረዋል።

ኢኽላስ እና የመለኮታዊ ጥሪ ጊዜ

የውድቀት ሌሊት  በምእመን ልብ ውስጥ ኢኽላስ (ቅንነት) የሚያንፀባርቅበት ጊዜ ነው። በዚህ ሰዓት ማንም አያየውም፤ “ይዩልኝ” የሚባልበት ስሜት የለም፤ ግንኙነቱ ከጌታው ጋር ብቻ ይሆናል።

ከሁሉም የበለጠ በረከት ካለባቸው ጊዜያት አንዱ የሌሊቱ መጨረሻው አንድ ሶስተኛ ክፍል ነው። በዚህ ጊዜ ጌታችን (ሱ.ወ) ወደ ቅርቢቱ ሰማይ ይወርድና እንዲህ ይላል፦

“ማን አለ የሚለምነኝ? የምቀበለው። ማን አለ የሚጠይቀኝ? የምሰጠው። ማን አለ ምህረትን የሚጠይቀኝ? ይቅር የምለው።” (ሐዲሰል ቁድሲ)

ይህ ምንኛ ታላቅ እድል ነው! የዓለማቱ ጌታ በቀጥታ ጥሪ እያቀረበልን ፣ እኛስ እንዴት እንቅልፍ ይወስደናል?

ከጭንቀት ባሻገር፡ ከሀያሉ ጌታ ጋር መገናኘት

ሶላት ሶላት የጭንቀት መፍትሄ ነው። ከጌታህ ጋር የምትገናኝበት ነው። ጌታህን እንዴት መውደድ እንዳለብህና በእሱ ላይ እንዴት መመካት እንዳለብህ ያስተምርሃል።

ሶላት በእውነት ከሚያውቅህ ጋር ያለች መገናኛ መንገድ ናት፡፡ ጭንቀቶችህን ሁሉ ከንተ ላይ የማስወገድ ሃይል በእጁ ከሆነው ጋር የምትገናኝበት፤ በዚህችም ሆነ በመጪው ዓለም የምትፈልገው ነገር ሁሉ በእጁ በሆነው ጌታ ፊት ስትቆም፣ ጉዳዮችህ ሁሉ ቀላል ይሆናሉ። ምክንያቱም ሁሉም ነገር በጌታህ እጅ ነውና!

ማጠቃለያ

ሶላት የዕለት ተዕለት ግዴታ ብቻ ሳትሆን የጭንቀት መፍትሄ ከህይወት ውጥረት የምናመልጥበት መለኮታዊ ማረፊያ ነው።

በተለይም የሌሊት ሶላት ፣ ከፈጣሪያችን ጋር ያለንን ግንኙነት በማጠናከር ፣ በችግሮቻችን ጊዜ መፍትሄና የልብ እርጋታን እንድናገኝ ይረዳናል።

ሶላታችነን ስናስተካክል ፣ ህይወታችን በራሱ ጊዜ ይስተካከላል። እውነተኛው ሰላምና ደስታ ያለው ከጌታችን ጋር በሶላት ስንገናኝ ብቻ ነው።

በዚህ ርዕስ ላይ የእርስዎ አስተያየት ምንድን ነው? የሶላት በህይወትዎ ላይ ያመጣውን በጎ ተጽዕኖ ከታች ባለው የአስተያየት መስጫ ላይ ያጋሩን።

Related posts

Leave a Comment

Your email address will not be published. Required fields are marked *

Share