ሪባ (ወለድ ፣ አራጣ) ማለት አበዳሪው ከተበዳሪው ሰው ከአበደረው ገንዘብ በላይ አስበልጦ የሚቀበለው ገንዘብ ነው። ሪባ መቀበል በእስልምና ትልቅ ወንጀል ነው። ሙስሊሞች ይህን ተግባር እንዲተው አሏህ አዟል
አል-ቁርአን
(ሱረቱል በቀራ 2፡278-279)
እናንተ ያመናችሁ ሆይ! አሏህን ፍሩ። አማኞች እንደሆናችሁ ከአራጣ የተቀረውን ተው። (ይህን) ብትሰሩ ከአሏህና ከመልዕክተኛው የሆነችን ጦር ተጠንቀቁ።

ሁለት ሪባ አይነቶች
- ሪባ አነሲአህ (የብድር ወለድ)
ይህ የሪባ አይነት የተለያየ ቅርፅ አለው።
ሀ) አበዳሪ ለተበዳሪው በጊዜ ገደብ ወስኖ ገንዘብ በመስጠት ጊዜው ሲያልፍ እና ተበዳሪው እዳውን መክፈል ሳይችል ሲቀር ተጨማሪ ጊዜና ተጨማሪ ገንዘብ ጨምሮ እንዲከፍል የሚያደርግበት የአራጣ ብድር ነው።

ለ) ተበዳሪው ለአበዳሪው በየወሩ ቁርጥ ያለ የወለድ መጠን እየከፈለ ብድሩ የሚመመለስበት ጊዜ ሲደርስ ተበዳሪው ለአበዳሪው የወሰደውን ዋናውን ገንዘብ የሚመልስበት የአራጣ ብድር ነው።
ሐ) በተወሰነ ቀን እና ቁርጥ ባለ የወለድ መጠን ቀኑ ሲደርስ ተበዳሪ ለአበዳሪ ጠቅልሎ የሚከፍልበት የአራጣ ብድር አይነት ነው።
- ሪባ አል-ፈድል (የንግድ ወለድ) ይህ አይነቱ አራጣ ተበዳሪው ለአበዳሪው የሚከፍለው ተመሳሳይ የሆነ ተጨማሪ ክፍያ ሲሆን ሸቀጥ የተለዋወጡ ከሆነ ሸቀጥ ፣ ገንዘብ ከሆነ ገንዘብ ፣ ዱቄት ከሆነ ዱቄት ፣ ሩዝ ከሆ ሩዝ ጨምሮ የሚከፍሉበት የአራጣ አይነት ነው።
ነብዩ ሙሐመድ (ሰ.ዐ.ወ) እንዲህ አሉ፡
ነብዩ ሙሐመድ (ሰ.ዐ.ወ)
(ሙስሊም)
“ወርቅ የሚከፈለው በወርቅ ፣ ብር የሚከፈለው በብር ፣ ስንዴ በስንዴ ፣ ገብስ በገብስ ፣ ተምር በተምር እና ጨው በጨው ፣ ተመሳሳይ በተመሳሳይ ነው። ክፍያ የሚፈፀመውም ወዲያውኑ ነው። ጨምሮ የሰጠ ሰው ወይም አብልጦ የጠየቀ ሰው ግብይታቸው በአራጣ ላይ ነው። ተቀባዩም ሰጭውም እኩል ጥፋተኛ (ወንጀለኛ) ናቸው።”
ሙስሊሞች የሪባ ንግድ አይነቶች ሁሉ መተውና መራቅ አለባቸው። ነብዩ (ሰ.ዐ.ወ) አሉ፡
ነብዩ ሙሐመድ (ሰ.ዐ.ወ)
(ሙስሊም)
“አሏህ ሪባ የተቀበለውን እና የሚከፈለውን ሰው ረግሟል። ሁለቱም ለእሷ ምስክር እና አንዱ መዝጋቢዋ ናቸው ብለዋል።” ነብዩ (ሰ.ዐ.ወ) ሁሉም ወንጀለኛ መሆናቸውን ገልፅ አድርገውታል። ሆኖም “ሁሉም ተመሳሳይ ናቸው” አሉ።



Share