የኢባዳ መሰረቶች ከመዳሰሳችን በፊት ኢባዳ የሚለው ቃል ትርጉም እንመልከት፡፡ ኢባዳ (ኡቡዲያ) ብዙ ጊዜ የአምልኮ ተግባር በሚል ይተረጎማል።
ኢባዳ ማለት የአሏህን ውዴታ በመፈለግ በመተናነስ እና እጅ በመስጠት እሱን መታዘዝ እና መገዛት ነው። ሸኹል ኢስላም ኢብን ተይሚያ እንዲህ አሉ፡
“ኢባዳ አሏህ የሚወዳቸውን እና የሚደሰትባቸውን በግልፅም በድብቅም ፣ በንግግርም በተግባርም የሚሰሩ የአምልኮት ተግባራትን ሁሉ አቅፎ የሚይዝ ቃል ነው።”
ኢባዳ ማለት ሸሪአዊ ፍቹ አሏህ የሚወደው ማንኛውም በግልፅም ይሁን በድብቅ የሚሰራን፤ በንግግር እና በተግባር የሚገልፅን ስራ ሁሉ የሚያጠቃል ቃል ነው።
ሸኹል ኢስላም ኢብንተይሚያ ኢባዳ ማለት አሏህ በመልዕክተኛው ምላስ ያዘዘውን ነገር በመከተል አሏህን መታዘዝ ነው ብለዋል።
ኢብነል ቀይም ከኢባዳ ጋር ተያያዥነት ያላቸውን ነገሮች ሲገልፁ ኢባዳ በአስራ አምስት መርሆዎች ዙርያ ያጠነጥናል። እነሱንም ያሟላ ኡቡድያን (ለአሏህ ያለውን ባርነት) አሟልቷል።
ኢባዳ በልብ ፣ በምላስ እና በአካል (በመገጣጠሚያዎች) የሚፈፀም ተብሎ የሚከፈል ሲሆን እያንዳዳቸውም ሁሉንም ስራ የሚያጠቃልሉ የሆኑ አምስት አምስት ውሳኔዎች (ህግጋቶች) አሏቸው።
እነዚህም ዋጅብ (ግዴታ) ፣ ሙስታሃብ (የተወደደ) ፣ ሐራም (የተከለከለ) ፣ መክሩህ (የተጠላ) እና ሙባህ (የተፈቀደ) ናቸው ብለዋል።
ኢማም ቁርጡብይ የኢባዳ መሰረቱ መተናነስ እና እጅ መስጠት (መታዘዝ) ነው ብለዋል።
ታላቁ ሙፈሲር እና የአልቢዳያ ወኒሃያ አዘጋጅ ኢብን ከሲር የኢባዳን ትርጉም ሲያስቀምጡ ኢባዳ ማለት አሏህ ያዘዘውን ነገር በመስራት የከለከለውን ነገር በመከልከል ለእሱ ታዛዥ መሆን ነው።
የኢስላም ትርጉም ኢስቲስላም ሲሆን ኢስቲስላም ማለት በሙሉ ታዛዥነት እና መተናነስ ለአሏህ እጅ መስጠት ማለት ነው ብለዋል።
ይህን ንግግራቸውንም ሲገልፁ በእርግጥም አሏህ ፍጡራኖችን የፈጠረው እሱን በብቸኝነት እንዲገዙት እና በእሱም ላይ ምንምም ነገር ላያሻርኩ ነው።
አሏህ እሱን ለታዘዘ ሰው የሚመናዳው ሲሆን እሱን ያልታዘዘው ግን ከባድ በሆነ ቅጣት ይቀጣዋል።
እሱ ከነሱ የማይፈልግ ሲሆን እነሱ ግን ከእሱ በእያንዳንዱ አጋጣሚና ሁኔታ ይፈልጉታል። ምክኒያቱም የፈጠራቸው ፣ የሚሰጣቸው ፣ የሚነሳቸው እሱ ነውና ብለዋል።
የመፈጠራችን ሚስጥር
እኛ የሰው ልጆች የተፈጠርነው ለአንድ ታላቅ ለሆነ አላማ ሲሆን ሌሎች የምናቅዳቸውና የምንስራቸው ስራዎች ይህንን ታላቅ አላማ ከዳር ለማድረስ የሚረዱን ናቸው።
ሆኖም አንዳንድ እምነት አልባዎች ፈጣሪ እሚባልም ሆነ ጀነት እና ጀሐነም የሚባል ነገር የለም በማለት የሰው ልጅ የተፈጥሮ ግኝት ወይም የዝግመተ ለውጥ ውጤት እንደሆነ በማሰብ የሰውን ልጅ ያለ አላማ ማስቀረት ይሻሉ።
ነገርግን አሏሁ አዘወጀል እኛ የሰው ልጆች የተፈጠርንበትን ታላቅ አላማ ቅዱስ ቁርአን ላይ በማያሻማ መልኩ ገልፆልናል።
አሏሁ አዘወጀል በሱረቱል ማኢዳ አንቀፅ 56 ላይ እንዲህ ይለናል፦ “በእርግጥ የሰው ልጆችንም ሆነ አጋንትን አልፈጠርኳቸውም እኔን ሊገዙኝ ቢሆን እንጅ።”
አል-ቁርአን
(ሱረቱል አንዓም 6:162)
“በል! እነሆ ሶላቴ ፣ እርዴ ፣ ህይወቴ ፣ ሞቴ ለአሏህ፤ ለአለማቱ ጌታ ነው። አጋር የለውም።”
አል-ቁርአን
(ሱረቱል ማኢዳ 5:72)
“እነሆ በአሏህ ላይ ያሻረከ (ያጋራ) በእርግጥ አሏህ ጀነትን በእሱ ላይ እርም አደረጋት። እናም መኖሪያው እሳ ነው። በዳዮችም ረዳቶች የላቸውም።”
ኢባዳ በእስልምና ሃይማኖት ሁለት ቅድመ ሁኔታዎች ማሟላት አለበት
- አሏህ የደነገገውን ነገር መከተል እና መልዕክተኛው (ሰ.ዐ.ወ) የሰሩበትን ፣ ያዘዙትን እና የከለከትን ማኝኛውንም ነገር መታዘዝ እና መከልከል ነው። ይህ ለአሏህ እጅ የመስጠት እና የመታዘዝ ማሳያ ነው።
- አሏህ (ሱ.ወ.ተ) የደነገገውን ነገር ሲከተሉ ሙሉ በሙሉ ከልብ አሏህን በመውደድ እና የእሱን ውዴታ በመፈለግ መሆን አለበት።
አሏህ የሰው ልጆችን የፈጠረበትን አላማ በቁርአኑ ግልፅ አድርጎታል።
አል-ቁርአን
(ሱረቱል ዛሪያት 51፡56)
ጅኖችንም ሆነ የሰው ልጆችን አልፈጠርኳቸውም እኔን ሊገዙኝ ቢሆን እንጅ።

ከኢባዳ ጋር የተያያዙ ጠቃሚ መርሆዎች
አሏህ መልዕክተኞቹን የላከውም ለዚህ አላማ ነው። ኢባዳ በእስልምና ሁሉን አቀፍ ሲሆን ሁሉንም የሰው ልጅ ህይወት ሁኔታ የሚወክል ነው። ኢባዳ በግልፅም በድብቅም የሚሰሩ ተግባራቶችን ሁሉ ያጠቃልላል።
ለምሳሌ ሶላት መስገድ ፣ ዘካ መስጠት ፣ ፆም ፣ ሐጅ ፣ ለወላጆች እና ለዘመዶች ደግ መሆን ፣ ቃልኪዳን መፈፀም ፣ ስምምነቶችን ማክበር ፣ በመልካም ነገር ማዘዝ እና ከመጥፎ ነገር መከልከል ፣ አሏህን ዘወትር ማስታወስ እና ቁርአን መቅራት ወ.ዘ.ተ ናቸው። እንዲሁም በቀለብ የሚሰሩ ተግባራቶችን ይይዛል።
ለምሳሌ አሏህ እና መልዕክተኛውን (ሰ.ዐ.ወ) መውደድ ፣ አሏህን መፍራት ፣ ምህረቱን መለመን ፣ በድንጋጌው (በውሳኔው) መደሰት ፣ እዝነቱን ተስፋ ማድረግ እና ቅጣቱን መፍራት ናቸው።

በእርግጥ ማንኛውም ተግባር በኢህላስ ለአሏህ ተብሎ ከተሰራና በመጭው አለም ህይወት ምንዳን ተፈልጎበት ከሆነና በነብዩ (ሰ.ዐ.ወ) መመሪያ መሰረት ከተሰራ እንደ አምልኮ ተግባር ይቆጠራል።
ፍላጎታችነን ለማርካት በምናደርገው ተግባር ሃሳባችን (ኒያችን) ጥሩ እስከሆነ ድረስ እንደ ኢባዳ ይቆጠራል። ነብዩ (ሰ.ዐ.ወ) ባንድ ወቅት እንዲህ አሉ፡
ነብዩ ሙሐመድ (ሰ.ዐ.ወ)
(ሙስሊም)
“ከሚስቶቻችሁ ጋር ያላችሁ ግኑኝነት ሶደቃ ነው” ብለዋል። ሶሃባዎችም “ፍላጎታችነን ነው ያረካነው፤ ከአሏህ ምንዳ እናገኛለን ሲሉ ጠየቋቸው። እሳቸውም ‹አዎ ሲሉ መለሱ። “በተፈቀደው መልኩ ከፈፀማችሁ ለእሱ ምንዳ ታገኛላችሁ” አሏቸው።
1 እውቀት ከስራ ይቀድማል
የሰው ልጅ ማንኛውንም ነገር የሚሰራው መስራት ባሰበው ነገር ላይ እውቀት ሲኖረው ነው። ካልሆነግን ውጤቱ ድካምና ጥፋት ነው።
አንድ ሰው የአንድሮይድ አፕልኬሽን ደቨሎፕ ማድረግ ይፈልጋን እንበል። ሆኖም ግን እንዴት ኮዲንግ ማድረግ እንደሚቻል የማያውቅ ከሆነ ይህ ሰው አፕልኬሽኑን ደቨሎፕ ማድረግ ይችላል? አይችልም! ለምን? እንዴት ኮዲን ማድረግ እንዳለበት እውቀት የለውምና።
በተመሳሳይመልኩ አንድ ሰው ኢባዳ የአምልኮ ተግባራት ለመስራት በሚሰራው ነገር ላይ እውቀት ሊኖረው ይገባል። ያለበለዚያ ስራው ድካም ብቻ ነው የሚሆነው።
አንዳንዴም ወደ ጥፋት ሊመራው ይችላል። ምክኒያቱም ያለ እውቀቱ የቢድአና የሽርክ ተግባራትን ሊሰራ ይችላልና።
ኢማሙ ቡኻሪ በኪታባቸው መግቢያ ላይ እውቀት ከስራና ከንግግር ይቀድማል ብለዋል።
ኢብን ሐጀር ለንግግርና ለስራ መስተካከል ቅድመሁኔታው እውቀት ነው። ልክ ለስራ መስተካከል የኒያ መስተካከል ቅድመሁኔታ እንደሆነው ሁሉ ብለዋል።
ትረካ የሚመጣው ከጥናት ቡኋላ እንደሆነው ሁሉ ስራም የሚመጣው ከእውቀት ብኋላ ነው።
2 ለአሏህ ቅን መሆን ወይም ስራን በኢህላስ መስራት
ኢህላስ ማለት ማንኛውንም መልካም ስራ አጥርቶ የአሏህ ምንዳና ውዴታ እንደሚገኝበት አስቦ ለአሏህ ብቻ አድርጎ መስራት ነው።
ይህም ከሰዎች ክብርና ዝና ፣ ስልጣን ፣ ገንዘብ ፣ ለዩዩልኝና ለይስሙልኝ ለሚሉ ነገሮች ተፃራሪ የሆነ ነው። መልካም ስራም ተቀባይነት የሚኖረው ኢህላስ ሲኖረው ነው።
ኢብን መስኡድ ንግግር ያለተግባር አይጠቅምም፤ ተግባርም ያለ ንግግር አይጠቅምም።
ሁላቸውም አይጠቅሙም በተስተካከል ኒያ ካልሆነ በቀር፤ ኒያም አይጠቅምም ከሱና ጋር እስካልገጠመ ድረስ ብለዋል።
3 ከሱና ጋር መግጠም
አል-ቁርአን
(ሱረቱል አንዓም 6:152)
በእርግጥ ይች ቀጥተኛ መንገዴ ናት፤ ተከተሏት።
አንድ የአምልኮት ተግባር ተቀባይነት ሊኖረው የሚችለው የአምልኮት ተግባሩ ረሱል (ሰ.ዐ.ወ) በሰሩበት መንገድ የተሰራ እንደሆነ ነው።
ይህ ካልሆነ ግን ወደ ቢድአ የሚያዘነብልበት ነገር ያመዝናል። የሙዕሚኖች እናት አኢሻ (ረ.ዐ) እንዳስተላለፈችው
የአሏህ መልዕክተኛ (ሰ.ዐ.ወ) በጉዳያችን ያልሆነን (በሃይማኖታችን የሌለን) ነገር የሰራ ሰው እርሱ ተመላሽ ነው (ከእሱ ተቀባይነት የለውም) ብለዋል።
በሌላ ዘገባ የአሏህ መልዕክተኛ(ሰ.ዐ.ወ) ሁሉም ፈጠራ ጥመት ነው፤ ሁሉም ጥመት የሳት ነው ብለዋል።
አሏሁ አዘወጀል የእሱ ውዴታ የሚገኘው መልዕክተኛውን በመከተል ላይ እንደሆነ ሲገልፅ እንዲህ አለ፦
አል-ቁርአን
(ሱረቱል ኢምራን 3:31)
አሏህን የምትወዱ እንደሆናችሁ ተከተሉኝ አሏህ ይወዳችኋል፤ ሃጢያቶቻችሁንም ይምርላችኋል። በእርግጥ አሏህ መሃሪ አዛኝ ነው በላቸው!
አቡ ኹረይራ (ረ.ዐ) ባስተላለፈው ሐዲስ የአሏህ መልዕክተኛ (ሰ.ዐ.ወ) ሁሉም ኡመቶቼ ጀነት ይገባሉ እምቢ ያለው ሲቀር አሏቸው። እሱ ማነው እምቢ ያለው? ብለው ሲጠይቋቸው። እኔን የታዘዘ ጀነት ገባ፤ እኔን ያልታዘዘ በእርግጥ እንቢ አለ ብለዋል።

