መግቢያ
አንድ ዘገባ እንዲህ ይላል፡- “ከመጽሐፉ ሰዎች ወደ ሆኑ ሕዝቦች ትሄዳላችሁ። የመጀመሪያ ጥሪ የምታደርጉላቸው አላህን ማምለክ ይሁን። አላህን ካወቁ በኋላ በቀንና በሌሊት አምስት ሶላቶችን መስገድ አላህ በእነሱ ላይ ግዴታ ያደረገባቸው መሆኑን አሳውቋቸው።” [ቡኻሪ ፣ ሙስሊም]
ይህ ሐዲስ ግልጽ ነው። ብዙ ማብራሪያ አያስፈልገውም። ነቢዩ (ሰለላሁ ዓለይሂ ወሰለም) ይህንን መርህ ወደ እስልምና በሚያደርጉት ጥሪያቸው ላይ ተግባራዊ አድርገውታል።
ለአሥራ ሦስት ዓመታት መካ ከተማ ቆይተው ሰዎችን እና ባልደረቦቻቸውን ይህን ነጥብ ለማስተማር እና የሰዎችን እምነት ለማስተካከል ሞክረዋል። ባልደረቦቻቸው ያደጉት በዚህ መንገድ ነው።
ጁንዱብ ኢብኑ አብደላህ አል-በጀሊ እንዲህ ብለዋል፡- “ኢማንን (እምነትን) ተማርን ከዚያም ቁርአንን ተማርን፤ ኢማናችንንም ጨመረልን።”
አብደላህ ኢብኑ ኡመር እንዲህ ብለዋል፡- “ከቁርአን በፊት እምነትን የምንቀበልበት ጊዜ ላይ ነበር የኖርነው፤ ሱራዎች በሚወርዱበት ጊዜ ምን እንደፈቀዱ ፣ ምን እንደከለከሉ ፣ ምን እንዳዘዙ እና በእነሱ ላይ ምን ዓይነት አቋም መያዝ እንዳለብን እንማር ነበር። ነገር ግን ከእነሱ መካከል ከእምነት በፊት ቁርአን የተሰጡ ብዙ ሰዎችን አይቻለሁ፤ ከመጽሐፉ መጀመሪያ እስከ መጨረሻው ያነበዋል፤ ምን እንዳዘዘ ፣ ምን እንደከለከለ እና በእሱ ላይ ምን ዓይነት አቋም መያዝ እንዳለበት አያውቅም። እሱ ልክ የተምር ፍሬን እንደሚጥል ሰው ነው [ይህም ከንባቡ ምንም አይነት ጥቅም አያገኝም ማለት ነው]።”
ነቢዩ (ሰለላሁ ዓለይሂ ወሰለም) ባልደረቦቻቸውን ያሳደጉት በዚህ መንገድ ነው፡፡ በመጀመሪያ ኢማን ከዚያም ቁርአን። ይህ ኢማም አቡ ሐኒፋ ካመለከቱት ጋር ተመሳሳይ ነው፡፡ መጀመሪያ ሃይማኖቱን (ተውሂድን) መረዳት ከዚያም ሸሪአ መረዳት ነው።
እምነቶች በመጀመሪያ መስተካከል አለባቸው፡፡ ከዚያም የሃይማኖቱ ሌሎች ገጽታዎች በሙሉ ይከተላሉ።
ኢማም አሻፊኢ እንዲህ ብለዋል፡- “አንድ ባሪያ ከአላህ ጋር ሽርክን ሳይጨምር ሌላ ማንኛውም ሃጢያት ሰርቶ ቢገናኝ ፣ በእምነት ላይ ማንኛውንም አዲስ ፈጠራ ሰርቶ ከመገናኘት የተሻለ ነው።”
የአቂዳ ፍች
ቋንቋዊ ፍች
አቂዳ በቋንቋ ደረጃ አቀደ ከሚለው ቃል የተገኘ ነው። በአረብኛ አንድ ሰው “ገመዱን አቀደ” ሲል ገመዱ በደንብ ታሰረ ማለት ነው። እንዲሁም “ሽያጩን አቀደ” ወይም “ሽያጩን ፈፀመ” ሲባል ሰውየው ሽያጩን ወይም ስምምነቱን አፀደቀ እና ተዋዋል ማለት ነው።
አላህ በቁርአን እንዲህ ይላል፡-
አል-ቁርአን
ሱረቱ ኒሳዕ 4፡33
“ቀኝ እጆቻችሁ ቃል ኪዳን ያደረጉላቸውም (አረብኛ፡ አቀደት)።”
አላህ እንዲህ ይላል፡-
አል-ቁርአን
ሱረቱል ማኢዳ 5:89
“ነገር ግን በቁርጥ የምትምሏቸውን መሐላዎች ይጠይቃችኋል (አረብኛ፡ አቀድቱም)”
ይህም ማለት በዚህ የቁርአን አንቀጽ እንደተረጋገጠው
አል-ቁርአን
ሱረቱ ነህል 16:91
“ያረጋገጣችሁዋቸውና የያዛችሁዋቸው” ማለት ነው፡፡ “መሐላዎችን ካረጋገጣችሁ በኋላ አታፍርሱ”
አንድ ሰው “እንደዚህ እንደዚህ አቀድኩ” ቢል ልቡ እንዲህ ባለው ነገር ላይ ፀንቷል ማለት ነው።
ሸሪአዊ ፍችና ተያያዥ መጠሪያዎች
ስለዚህ አቂዳ ወይም አል-ኢዕቲቃድ በኢስላም ሊቃውንት ዘንድ፡ አንድ ሰው ያለምንም ማመንታት ወይም ጥርጣሬ በልቡ ያለው የፀና እምነት ነው። ከማንኛውንም ግምት ወይም ጥርጣሬን የፀዳ ማለት ነው።
ኢማም አቡ ሐኒፋ ይህንን ታላቅ ርዕሰ ጉዳይ አል-ፊቅሁል አክበር (“ታላቁ ግንዛቤ”) እና የሃይማኖቱ ግንዛቤ ብለውታል። የሕግ ሳይንስን (በአረብኛ፡ ሸሪአ) የሳይንስ ግንዛቤ ብለውታል።
ብዙ የእስልምና ሊቃውንት አንድ ሰው ማመን ያለበትን ጉዳዮች በሙሉ ለመግለፅ ተውሂድ የሚለውን ቃል ይጠቀማሉ።
ምክንያቱም ከእነዚህ ጉዳዮች ውስጥ በጣም አስፈላጊው “ከአላህ በስተቀር በእውነት የሚመለክ አምላክ የለም” በሚለው ሐረግ ውስጥ የሚገኘው መሠረታዊ ተውሂድ ነው።
ተውሂድ በእነርሱ ዘንድ በሁለት ይከፈላል፡ የእውቀት እና የማረጋገጫ ተውሂድ እንዲሁም የዓላማ እና የሥራ ተውሂድ ነው።
የእውቀትና የማረጋገጫ ተውሂድ የምንለው የፈጣሪ አንድነት ተውሂድ እና የእሱ ስሞች እና ባህሪያት ተውሂድ ነው፡፡
ይህ ማለት እሱ ብቸኛው ፈጣሪ መሆኑን እና በስሞቹና በባህሪያቱ ብቸኛ መሆኑ ማመን እና ማረጋገጥ ነው። የአላማ እና የሥራ ተውሂድ ማለት የጌትነት ተውሂድ ወይም ከአላህ በስተቀር ማንም ሊመለክ አይገባውም [ሊመለክ የሚገባው እሱ ብቻ ነው] ብሎ ማመን ነው።
የአስተሳሰብ ሊቃውንት (አረብኛ፡ ከላሚዩን) – የአስተሳሰብ ሊቃውንት እነማን እንደሆኑ ማን ያብራራልዎታል – ይህንን ታላቅ ርዕሰ ጉዳይ “የሃይማኖት መሰረት” ብለው ይጠሩታል፡፡ ሕግን ደግሞ “የሃይማኖት ቅርንጫፎች” ብለው ይጠሩታል።
ይህ የእነሱ የቃላት አጠቃቀም ነው። ሁሉንም እንደ አስፈላጊነታቸው ስም ወይም ቅጽል ይሰጣሉ።
ኢማን፡ የቁርአን መገለጫና የእምነት ምሰሶዎች
ነገር ግን ቁርአን ይህንን ጉዳይ ምን ብሎ ይጠራዋል?
ቅዱስ ቁርአን ይህንን ከባድ ጉዳይ ኢማን ብሎ ይጠራዋል። አላህ በቁርአን እንዲህ ይላል፡-
አል-ቁርአን
ሱረቱል ሹራ 42፡52
“እንደዚሁም ከትዕዛዛችን የሆነን መንፈስ ወደ አንተ (ሙሐመድ) አወረድን። መጽሐፉ ምን እንደሆነ ፣ እምነትም ምን እንደሆነ አታውቅም ነበር። ነገር ግን ከባሪያዎቻችን መካከል የምንሻውን በእሱ የምናመራበት ብርሃን አደረግነው።”
የአማኙ ልብ በእርግጠኝነት ሊያምንባቸው የሚገቡ አጠቃላይ ጽንሰ-ሐሳቦች የዚህ እምነት “ምሰሶዎች” ናቸው። ነገር ግን አንድ ሰው እነዚህን ምሰሶዎች በማወቅና በመረዳት ብቻ አማኝ አይባልም፡፡
ይልቁንም በሐዲሰል ጅብሪል ውስጥ እስልምና ተብሎ ለተገለፀው ነገር መታዘዝ እና መተግበር አለበት።
ኢማን በዚህ መልኩ እስልምናን ያካትታል።
ኢማን በልብ ውስጥ ያሉትን እውነታዎች ማወቅ ብቻ ቢሆን ኖሮ ጓደኛው ከሰይጣን እና ከፈርኦን ጋር እኩል ይሆን ነበር፡፡
ማስታወሻ፡ ሰይጣን ጌታውን ከሁሉም በላይ የሚያውቅ ቢሆንም በኩራቱና በምቀኝነቱ ምክንያት ጠፍቷል። ምንም እንኳ ፈርኦን ጌታ ነኝ ብሎ ቢናገርም ጌታ አላህ እንደሆነና ከእሱ በስተቀር ማንም ሊመለክ እንደማይገባው ያውቅ ነበር። አላህ እንዲህ ይላል፡-
አል-ቁርአን
ሱረቱል ኢስራዕ 17:102
“እሱም አለ፡ በእውነት እነዚህ ተአምራት የሰማያትና የምድር ጌታ ማስረጃ አድርጎ ያወረዳቸው ከመሆኑ በስተቀር ሌላ ማንም እንዳላውዳቸው አውቀሃል…”
ምንም እንኳ እውነቱን ቢያውቁም ኢባዳቸውን ለአላህ ብቻ በማድረግ በተግባር አላሳዩም።
በሐዲሰል ጅብሪል ነቢዩ (ሰለላሁ ዓለይሂ ወሰለም) እያንዳንዱ ሰው ማመን ስላለበት ስለ እምነት ምሰሶዎች ተጠይቀው ሲመልሱ እንዲህ ብለው አብራርተዋል፡-
ነብዩ ሙሐመድ (ሰ.ዐ.ወ)
“ኢማን ምንድን ነው?” ሲባሉ፡- “በአላህ ፣ በመላእክቱ ፣ በመጽሐፎቹ ፣ በነቢያቱ ፣ በመጨረሻው ቀን እንዲሁም በመልካምና በክፉ ነገር ሁሉ አስቀድሞ መወሰን ማመን ነው።”
የመጽሐፍ ስጦታ
የእምነት መሰረቶች ትንታኝ
እያንዳንዱ ሰው እነዚህን ምሰሶዎች ማወቅ ፣ በትክክለኛ ግንዛቤ መማር ፣ እንዲሁም ጻድቃን ቀደምቶቻችን እንደተረዱት እና እንዳመኑባቸው ፣ የነቢዩ (ሰለላሁ ዓለይሂ ወሰለም) ባልደረቦች እንዳመኑባቸው እና እንደተረዷቸው እንዲሁም ተከታዮቻቸውና በመንገዳቸው የተከተሏቸው ሰዎች ባመኑበትና እንደተረዱት ማመን ግዴታ ነው።
ይህም አራቱን ኢማሞች ፣ ሱፍያን ሰውሪ ፣ ሱፍያን ኢብኑ ኡየይና ፣ አብደላህ ኢብኑል ሙባረክን እና የመሳሰሉትን እንዲሁም ሙሐመድ ኢብኑ ኢስማኢል አል-ቡኻሪን ፣ ሙስሊም ኢብኑል ሐጃጅን ፣ ሸይኹ ኢስላም ኢብኑ ተይሚያን እና አል-ሐፊዝ ኢብኑል ቀይምን ያካትታል።
እንዲሁም እነዚህን ምሰሶዎች በተመሳሳይ መንገድ በመረዳትና በማመን የተከተሏቸው ምሁራን ያጠቃልላል።
ይህ ሃላፊነት በደረሰበት ሰው ላይ የመጀመሪያው ግዴታ ነው። አስተያየታቸው ተቀባይነት ባላቸው ምሁራን መካከል በዚህ ጉዳይ ላይ ምንም ዓይነት የሐሳብ ልዩነት የለም።
የቀደምት ሊቃውንት ምስክርነት
ኢማም አቡ-ሐኒፋ እንዲህ ብለዋል፡- “የእምነት ግንዛቤ ከሳይንስ ግንዛቤ ይበልጣል።” በእምነት ማለታቸው ተውሂድ ሲሆን በሳይንስ ማለታቸው ደግሞ ሸሪአ ነው። የተውሂድ ግንዛቤን ከሸሪዓ ግንዛቤ አስቀድመዋል።
ሸይኹል ኢስላም አል-ሐሩዊ አል-አንሳሪ (481 ዓ.ሂ) ኢዕቲቃድ አህለ ሱናህ በተባለው መጽሐፋቸው መጀመሪያ ላይ እንዲህ ብለዋል፡- “በባሪያው ላይ የመጀመሪያው ግዴታ አላህን ማወቅ ነው።
ይህ በሙአዝ ሐዲስ የተረጋገጠ ነው፤ ነቢዩ (ሰለላሁ ዓለይሂ ወሰለም) እንዲህ ብለውታል፡- ‘ከመጽሐፉ ሰዎች ወደ ሆኑ ሕዝቦች ትሄዳለህ። የመጀመሪያ ጥሪህ አላህን ማምለክ ይሁን። አላህን ካወቁ በኋላ አላህ በቀንና በሌሊት አምስት ሶላቶችን ግዴታ እንዳደረገባቸው ንገራቸው…’
የኢማሙ አል-ቡኻሪ የአቀራርብ ዘድይና የአቂዳ ትኩረት
ከዚህ መነሻ ሃሳብ በመነሳት ታላላቅ የኢስላም ሊቃውንት ለምሳሌ ኢማም ሙሐመድ ኢብኑ ኢስማዒል አል-ቡኻሪ ከአላህ ቃል ቀጥሎ እጅግ ትክክለኛ በሆነው ኪታባቸው አል-ጃሚዕ አስ-ሳሒሕ ውስጥ ምን እንዳደረጉ አስተውሉ።
ስለ ሃይማኖቱ ባላቸው ጥልቅ እውቀትና ግንዛቤ ይህ ታላቅ ኢማም ኪታባቸውን የጀመሩት “የራዕይ ጅማሮ” በሚል ርዕስ ሲሆን ከዚያም በኢማን ምዕራፎች ፣ ከዚያም በእውቀት ምዕራፎች ተከትለዋል።
አላህ ይዘንላቸውና የመጀመሪያው ግዴታ በእያንዳንዱ ሰው ላይ እምነት ወይም ኢማን እንደሆነና ኢማን ማግኘት የሚቻለው በእውቀት እንደሆነ ለማሳየት የፈለጉ ይመስላል።
የእምነትና የእውቀት ምንጭ ደግሞ ራዕይ ነው። ስለዚህ ራዕዩ እንዴት እንደተከሰተና ምን ይመስል እንደነበር በማሳየት ጀመሩ። ከዚያም ኢማንና እውቀትን በመጥቀስ አስከተሉ። ይህ ዝግጅት ድንገተኛ አይደለም፤ በዚህ አስፈላጊ ነጥቦችን አድርገዋል።
ማጠቃለያ፡ የአቂዳ ማዕከላዊነትና የእውቀት ምንጮች
ይህም ልንጠቅሰውና ድምፃችንን ከፍ አድርገን ልናስተላልፈው የምንፈልገው አጠቃላይ ነገር ነው። የአቂዳ ጉዳይ መጀመሪያ ቅድሚያ የሚሰጠው ጉዳይ ነው።
እምነትና እውቀት እሱን ለማግኘት የሚረዱ መንገዶች ናቸው። የእውቀትና የእምነት ምንጭ ደግሞ ቁርአን እና ሱና ናቸው።
በዶክተር አብዱል አዚዝ አል-ቃሪ
ትርጉም በአህመድ የሱፍ
ምንጭ፡ አቂዳ (የእምነት ጉዳዮች)…መጀመሪያ…ቢያውቁ ኖሮ
ዝግጅት በ www.Islaam.com



Share